AzMİU əməkdaşları Türkiyədə ağıllı logistikaya dair müzakirələrdə iştirak ediblər [05.12.2022]

Azərbaycan Memarlıq və İnşaat Universitetinin (AzMİU) "Nəqliyyat və Logistika" kafedrasının əməkdaşları Valeh  Şərifov, Rəşad Allahverdiyev və Bulud Bağırov Türkiyənin İstanbul Universitetində keçirilən “Ağıllı Logistika” üzrə Beynəlxalq Konfransda iştirak ediblər.

Konfrans Türkiyənin İstanbul Universiteti, Bartın Universiteti və AzMİU-nun birgə təşəbbüsü ilə keçirilib. 

Konfransın birinci günü Valeh Şərifov çıxış edərək Konfrans iştirakçılarını salamladı, dəvətə görə Universitetin rəhbərliyinə təşəkkür etdi və Konfransın işinə uğurlar arzuladı.

AzMİU əməkdaşları konfransda məruzə ilə çıxış edərək ağıllı logistika ilə bağlı araşdırmaları, bu istiqamətdə gözləntilər və ölkəmizdə həyata keçirilən işlər haqqında məlumat veriblər. Azərbaycanın II Qarabağ müharibəsindən sonra azad olunmuş ərazilərində yenidənqurma işlərinin və logistikanın hansı mərhələdə inkişaf etdiyi mövzusunda konfrans iştirakçıları ilə müzakirələr aparılıb, müvafiq statistik məlumatlar təqdim edilib. 

Səfər zamanı İstanbul Universitetinin rəhbərliyi ilə görüş də keçirilib. Görüşdə qərara alınıb ki, logistika üzrə hər iki universitet əldə etdiyi bilik və təcrübəni qarşılıqlı olaraq bir-biri ilə paylaşsın, birgə araşdırmalar həyata keçirilsin.