“AzMİU Academy”nin növbəti məzunları mükafatlandırılıb

Azərbaycan Memarlıq və İnşaat Universitetinin (AzMİU) İnşaat fakültəsinin nəzdində   fəaliyyət göstərən “AzMİU Academy” növbəti məzunlarını yola salıb.

Mərasimdən öncə “AzMİU Academy” haqqında ətraflı məlumat verilib. Bildirilib ki, artıq 2 ildir fəaliyyət göstərən akademiya tələbələrin mühəndis proqramlarının mənimsənilməsinə olan ehtiyaclarının ödənilməsi məqsədi ilə təşkil olunur. Burada ödənişsiz olaraq “Autocad”, “3D Max”, “Adobe İllustrator”, “Adobe Photoshop”, “Corel Draw”, “Ofis” proqramları tədris edilir. Akademiyanın fəaliyyətə başladığı müddətdən bu günə qədər 400-dən çox tələbə bu kurslardan yararlanıb. Cari ildə isə kurslara 200 tələbə müraciət edib ki, onlardan 50-si təhsillərini müvəffəqiyyətlə tamamlayıb. 

Mərasimin gedişində Sosial məsələlər və ictimaiyyətlə əlaqələr üzrə prorektoru Orxan Naqdiyev və İnşaat fakültəsinin dekanı Sahib Fərzəliyevin çıxışları dinlənilib. Onlar mütəmadi olaraq təşkil edilən layihənin gənclər üçün önəminə toxunublar. Çıxışlarında kursların mühəndis proqramlarını daha dərindən mənimsəməyə dəstək göstərdiyi, səmərəli təhsil mühiti yaratdığı və ən əsası təhsil keyfiyyətini yüksəltdiyini qeyd ediblər. Sonda akademiyanın növbəti məzunları olan tələbələri təbrik edib, gələcək fəaliyyətlərində uğurlar arzulayıb.  

Mərasimin yekununda “AzMİU Academy”ni müvəffəqiyyətlə bitirən tələbələrə universitet rəhbərliyi tərəfindən sertifikatlar təqdim olunub.