"Code for future” təhsil layihəsi - Tələbələrimizə İT biliklərini inkişaf etdirmək şansı yaradılır

Azərbaycan Memarlıq və İnşaat Universitetində (AzMİU) “Code Academy” ilə Elm və Təhsil Nazirliyinin birgə həyata keçirdiyi “Code for future” təhsil layihəsi barədə infosessiya keçirilib.

İctimaiyyətlə əlaqələr və marketinq mərkəzinin direktoru İsa Muradov layihənin tələbələrimiz üçün önəmindən danışıb, hər birini “bootcamp”a  qatılmağa, gələcək karyeralarında lazım olacaq İT bacarıqlarını indidən təkmilləşdirməyə dəvət edib.

“Code Academy”nin layihə koordinatoru Asiya Rüstəmova universitetdə növbəti semestr tədris olunacaq “Code for future” təhsil layihəsi ətrafında təqdimat edib.  Müraciət qaydaları, tələb olunan göstəricilər, qoyulan şərtləri nəzərə çatdırıb. Ötən semestrdə AzMİU-da təşkil olunan təhsil layihəsinin nəticələri, məzun olan gənclərin uğurlarını xatırladıb.

Bildirək ki, “Code for future” təhsil layihəsinə seçilən tələbələr “bootcamp”dan Elm və Təhsil Nazirliyinin dəstəyi ilə ödənişsiz yararlanacaqlar. Onlar layihə boyu AutoCAD, Solidworks, Proqramlaşdırma bilikləri üzrə əldə etdikləri nəzəri bilikləri yerindəcə praktikada tətbiq edəcək, tədris proqramlarına qatılaraq mövcud semestrdə müvafiq ixtisas fənlərini əvəz etmə imkanı qazanacaqlar. Sonda proqramı uğurla tamamlayan məzunlar beynəlxalq və “Code Academy” sertifikatlarını əldə edəcəklər.